لو عندك ابن مش طبيعي

غريبة جدا

عندما يكون عندك ابن مش طبيعي بتعمل عشانه إيه ...؟

وبتقول عنه إيه قدامه أوقدام الناس ؟

ويا ترى بتعامله إزاي ؟

المشكلة .. إن الطفل اللي عنده مشكلة معينة بتخلينا نقول عنه إنه معاق دايما بيتعامل بطريقة خطأ .

بمعنى إنه بالذات ف البيت بنهمله اهمال كبير بسبب إنه مفيش فيه فايدة .

أو نسيبه يعمل اللي هو عاوزه عشان ياعيني الواد تعبان و يا ولاد متضربوش أخوكوا عشان هو عيان أصله مش فاهم ... أو لما الولد يعمل أي حاجة أوأي حركة ... كالاهتزاز المتكرر أو أن يضرب نفسه أو غيره بيتقال إيه ؟ عنده مرض أو عنده صرع أو عايش مع نفسه وخلاص ........ فيقولولك إيه .... سيبوه ياولاد .... محدش يقرب منه .

حرام نسيبه .. حرام علينا نسيبه كده لأنه بيعمل كده عشان ملاقاش حد يقوله لأ .... ويجيلنا الأولاد بسلوكيات وعادات نبتدي نغيرها عشان في البيت مكانش حد بيقوله لأ .

كان في بنت صغيرة جدا عندها 3 سنين ومشكلتها إنها اتولدت معاقة عقليا ( داون ) اللي شبه بعض دول ... المشكلة إن البنت دي مقطعة اخواتها وأبوها وأمها من الضرب والخربشة ..... ليه؟ لازم نحس بيهم ونسأل نفسنا ياترى بتعمل كده ليه ؟

البنت ديه بتلعب ... كل الحكاية انها عاوزة تلعب ومش عارفة عشان محدش بيلعب معاها وكمان مفيش استجابة منهم ف اللعب .. راحت ضرباهم عملوا إيه ؟؟ ضربوها ... جريوا منها وجريت وراهم .. خبوها من الضيوف عشان متضربهمش .... البنت لاقت استجابة زادت ضرب .

نعمل لها ايه ؟؟؟؟

1. نحاول نلعب معاها وألعاب كتير ... لان الأطفال أهم حاجة عندهم اللعب .

2. نعمل توعية للناس كلهم ميخافوش منها ويلاعبوها .

3. نفهمها إنها متضربش وإنها هتتعاقب لو ضربت تاني وهي هتفهم .

4. نشوف ايه الحاجات اللي بتحبها أوي عشان نديهالها مكافأة أوتعزيز لو مضربتش .

5. ونشوف إيه اللي الحاجات الي بتخاف منها أو بتكرهها ونعاقبها بيها لو ضربت.

6. لازم عشان نغير سلوك يبقى في سلوك تاني بديل يعني بدل مانضرب الناس نسلم عليهم ونبوسهم .

الطفل علشان يبقي كويس ومفهومه عن نفسه كويس لازم نتكلم عنه كويس قدامه وقدام الناس وإلا ........ ربنا يستررر وبلاش نتكلم عنه وحش حتى لو مطلع عنينا .

الأطفال أذكياء جدا في تعاملهم حتى لو كانوا معاقين .... خلوا بالكوم منهم .

على قد كده الأطفال دول سهل تكسب المعركة معاهم لو حبوك ...... وهو المطلوب إثباته ...

ايه المشكلة يا جماعة ؟

كل مشكلته إنه اتولد معاق :

والله العظيم مش ذنبه ؛ ومن ناحية الذنب هنا فالناس نوعين :
أولا : نوع بيقول ........ ( ياعيني عليك يابني ) ويمصمص شفايفه .. وإيه كمان هاتك يادلع ... وتيجي تكلمهم يقولولك إيه ثواب مش كفاية اللي هو فيه !!!!!!!!!!!!!

ثانيا : ونوع يقولك إيه ...( دي عيال مسخ وجتهم القرف ..... مش كفاية الباقي كمان العيال ديه اللي مالهاش لازمة ولا تعليمهم بيفيد البلد ف حاجة دي مصاريف رايحة ع الفاضي ...... دي عيال عاوزة الحرق أو الإعدام في ميدان عام ) .

المهم إن دول غلط .. ودوكهما برضه غلط ؛ لأن الأولاد المعاقين دول عبارة عن أطفال عاديين في مشاعرهم وإحساسهم مفيش فرق بينه وبين العادي

عشان كده لازم نربيه صح ومن الأول زيه زي العادي في أسلوب التربية
يعني:
شاطر وبرافو عليك في الحاجة الصح
وغلط ويتعاقب ف الحاجة الغلط

كل مشكلته معانا ان ذكاءه أقل شوية من العادي